بسم الله الرحمن الرحيم والصلاه والسلام على اشرف المرسلين سيدنا محمد وعلى اله وصحبه اجمعين
اخى المربى فى هذا الموضوع سوف نتحدث عن انتاج الالبان فى مصر وازى تقدر تكسب من المشروع كمان بس طبعا زى م انتو عارفين ان فى مقوله بتقول الاداره السيئه ممكن ان تهد ثروات حتى ولو كانت كبيره .بينما الاداره الناجحه تحافظ على الثروه ولو كانت صغيره .علشان مطولش عليك بقا تعالى نعرف اى هى العوامل الرئيسيه علشان تحافظ على الثروه اللى عندك
1. الخبره الفنيه باداره القطيع يعنى ايه الكلام ده .....هاقولك
العامل ده هو الاساس يعنى لازم تكون عندك خبره كافيه فى مجال الانتاج الحيوانى وكل ما يتعلق بالتغذيه ومن توزيع وتقديم العلائق( العلف يعنى )واتزانها حيث ان النغذيه تشمل 70%من تكاليف المشروع ومع زياده اسعار العلف اللى عماله تغلى يوم وراه التانى لازم تكون الخبره الفنيه ليها دور اساسى فى كيفيه تقديم التغذيه المتزنه والتى تحقق الانتاج المطلوب مع استخدام البدائل الاقل فى التكاليف والمتاحه وازاى تتجنب حدوث اى امراض لانه يؤدى الى المزيد من التكاليف وطبعا كل ده من ربحك انت
2.تانى حاجه وهى الخبره فى المعاملات التجاريه يعنى لازم تكون ابن بلد ومصحصح كده بمعنى انك تكون (ادرجى) وتعرف السوق رايح فين وجاى منين واى هو نوع الحيوان المطلوب والمناسب لمشروعك (وان شاء الله هنتكلم فى نوع الحيوان فى مقاله تانى وازى تختاره كمان )والانتاج بتاعك ينزل السوق فى الوقت المناسب يعنى فى الوقت اللى السوق يبقى محتاجه وكمان لازم تعرف البلد اللى فيها الآناث موجوده وبسعر كويس وقليل عن البلد او القريه التانيه
3.الخبره الاداريه الكامله وازاى تباشر عمالك والموظفين اللى عندك
انك تختارالناس اللى هاتشتغل معاك ديه حاجه مهمه وليها دور كبيير فى نجاح المشروع وبالذات لو مشروع انتاج الالبان ..... لان الحلاب يحتاج شخص ذو خبره فى التعامل مع الحيوانات يساعد على تحقيق انتاج عالى وايضا يكون على درايه كامله بكل من اعمال التسجيل وتدوين سير العمل والانتاج
وفى نقطه مهمه هنا وهى لما تيجى تعمل دراسه جدوى لازم تحدد المكان لان مشروع الانتاج الحيوانى فى الصحراء يختلف كثيرا عن الدلتا والوادى الجديد
فظروف الرعايه فى الصحراء تختلف فى عوامل مهمه :
- حيث فى الدلتا يعتمد المربى على تغديه الماشيه اللى عندو على البرسيم فى الشتا والعلف المركز مع التبن فى الصيف .اما فى الصحراء فيتوفر البرسيم الحجازى طول السنه وايضا المحاصيل الاخرى وذلك يؤدى الى انتاج ثابت للالبان
- لو انت هتربى فى الصحراء يبقى لازم تعوض نقص العناصر المعدنيه فى التربه بمعنى انك لازم كل فتره تحلل العلف بتاعك علشان تعرف الدنيا فيها ايه
- توافر بقايا المحاصيل الحقليه فى الدلتا زى قش الرز والاتبان وطبعا هى قليله فى الصحراء
ان شاء الله فى الموضوع اللى جاى هانتكلم على انواع الماشيه فى مصر المحليه والاجنبيه والخليط
اترككم فى رعايه الله وامنه
ليست هناك تعليقات:
إرسال تعليق